YouTube Channel pakhat Kameleon Music-ah channel neitu Rinawma leh BMA Chawngthu ten Mizo Hla Tha Bih Chianna hun an hmang a, P.S.Chawngthu hla phuah 'Nghilhlohna Par' an bihchiang a, a ngaihnawm kher mai.
Nghilh lohna Par
- P.S.Chawngthu
Sam ang then nite zawng lo herchhuak leh thin e,
Ami leng tawnah hian tuar dan hril thiam awm maw;
Duhlai leng zing zin tur hnah nem hling par an hlan,
Nghilh lohna ser ang cham thei tak maw.
Nghilh loh ngaihhrui thu di thlun nan lo par chhuak e,|
Inthen ni lo her chang lunglen dam te’n thawi nan;
Vangkhaw sira sedai theu a pal kara’n,
Thliah lai nghakin a lo par pawl riai.
RINAWMA
Nghilh lohna Par hi chang khat leh thunawn chauh a ni a, tawi viau angin lang mah se PS Chawngthu hian thu ril, thu ngaihnawm tak tak a bengkhawm avangin a ropui em em a ni.
BMA HLAWNDO
CHANG KHATNA
Sam ang then nite zawng lo herchhuak leh thin e
Inthen ni te zawng a rawn her chhuak leh thin a
Ami leng tawnah hian tuar dan hril thiam awm maw;
Mi zawng zawng zingah hian inthen lunglen thlak zia a hnemna thu hi sawi thiam an awm ang em le
Duhlai leng zing zin tur hnah nem hling par an hlan,
Kan duh tak te hmun hla taka an kal tur kha, Nghilh lohna Par (vaikawldaipar) an hlan thin a ni
Nghilh lohna ser ang cham thei tak maw.
A pangpar hlan chu a hriat rengna a ni thei ang em le
A THUNAWN
Nghilh loh ngaihhrui thu di thlun nan lo par chhuak e,
Ka hriat rengna lantirna atan Nghilh lohna Par (vaikawldaipar) hi a rawn par chhuak
Ka theihnghilh theih loh zia ka hriattir nan he pangpar hi a rawn par chhuak a ni
Inthen ni lo her chang lunglen dam te’n thawi nan;
Inthen ni a lo awm chang a, kan lunglen dam taka kan tawrh theih tur atan he pangpar hi kan inhlan thin
Vangkhaw sira sedai theu a pal kara’n, Thliah lai nghakin a lo par pawl riai
Kan khaw tawntirh dai, kan theuna karah sawn. Kha vaikawldaipar kha a lo par reng a ni|
Ka ngaihzawng hmun danga kal daih tur, ka theihngilh theih lohna tur atana ka pek tura ka thliah turin a lo par pawl reng a ni.
Thumal Sawifiahna
Sam ang then - Mihringin (hmeichhia pawh, mipa pawh) kan samah bari kan han then a, a inhnu chhawn thlap ang mai hian, inthen inhnunchhawn thlap sawi nan an hmang.
He hlaa inthen hi chu nupa inthen a ni lo a, ngaihzawng inthen a ni bawk lo a, mual hla kar danin a then a ni. Chutah pawh chuan sam ang then an la hmang vek a ni.
Zing zin - Tun hma chuan motor a la awm lo a, an zin dawn hian ban hman loh an hlauh avangin zingah an chhuak thin. Chuvangin zin sawi nan hian 'Zing zin' an hmang a, zing taka chhuak tihna a ni.
Hnah nem hling par - Hnah hnem ni bawk, hling nei ni bawk pangpar kha an pe thin. Chu chu vaikawldaipar a ni a, nghihlohna par hi hnam nem hling par tihna a nih chu.
Ser ang cham- Mihringten ser kan neih chuan taksaah hian a awm rei em em a ni. A then chu ser dam thei tawh lo, damchhunga awm ve reng te pawh a awm thin. Thil rei tak, daih rei tak sawi nan ser ang cham an hamng thin a ni.
Ngaihhrui - Pension emaw mi an awm tawh lo tur thlah nan hian NGAIHHRUINA an pe thin. An ngaihawmzia lantirna a ni a, a tawpah 'H' a awm lo - 'ngaihhrui' tih a ni.
