Nikum December thla khan ṭhian hovin Buannel kan han tlawh a, kan veng pa C. Vansanga'n thiam taka a sak 'Buannel Ram Dai' hla ril zia min hmuhfiah tirin min hneh hle.
Zan hnih meuh Chawngtinleri chet tlatna hmun Buannelah kan riak a, sawi thui zel pawh a châkawm. Republic Veng YMA chanchinbu zahawm tak Republican atan erawh Buannel-a min hruaitu Thlana nena kan titi-na hi kan hlui hmasa phawt ang che u.
Zokhawthar Tourist Lodge kan han thleng a, Buannel min hruaitu tur kan la hre lo. Lodge nghaktu Remi min kawhhmuh Thlana chu phone aṭangin kan bia a, hmuh hma hauhin kan ngaih a ṭha nghal hle.
Zingkarah Ṭiau kan thleng a, Thlana chuan min lo nghak vang tawh a. Mizo pa, pa te lam, hmelah lah chhuan tur a nei bik lo. Tunlai ṭhalai nalh tih 'six pack' letling thawkin a 'dul' pawh a kiar ve a, amaherawhchu Ṭiau chhehvelah chuan a tlangnel tih chu hmuh hmaih rual a ni lo.
Ṭhianten Buannel-a mamawh tur chakkhâi vel an lakkhawm lai chuan motor-ah bungrua kan dah a, thil ei tura kan kalsan leh dawn avangin a bo ka hlauh thu kan hrilh a. Ani chuan, "Ṭiau-ah chuan thil a bo ngai lo. Zokhawthar chu ni se kan dah ngam bik lo ang, ngaih ṭha takin awm rawh," tiin min hrilh. Burma ram china kan bungrua a him laia Mizoram ram china kan bungrua him ta lo chuan ngaihtuah a ti thui hle.
Tichuan, Buannel lam pan chuan kan kal a, kan titi pah zel bawk. Ṭiau kan pelh hma chuan kan ding zawk a, Thlana chuan, "Ka insak a nih ve hi. Kan bungruate hi seng lovin kan kalsan a, a bo ngai lo. Ṭiau-ah chuan thawh tur a tam a, thil an ru ngai lo," tiin an sawi zui a. Han awih loh dawnin a hma lawka kan bungraw dah lah bo pakhat mah a awm si lo a, Mizorama cheng Mizo nih a inchhuan loh thei khawp mai.
Ṭiau aṭang chuan in 40 vel awmna Old Lianhna kan thleng a, Buannel-a min puitu tur kan mamawh avangin Thlana chuan kawng sira mi pahnih awm chu Buannel-a kal turin a sawm a, min rawn zui ve mai bawk. Thlana chuan, "Rama che tla ṭhang an ni a, an fel bakah an rinawm," tiin min hrilh. Kan ṭhianho tana thu lawmawm awm tel bawk chu Thlana hian hlawkna um lovin kan kalpui tur thlengin a ṭha ber a ngaihtuah chho lai hi a ni.
Thlana te khua Chohte kan thleng a, a nu chuan rawng min lo bawl sak a. Ruahman dan chuan 'hotel' rate ang thoa chaw ei tur kan ni a, Buannel thlen hma kan inbeisei vangin Ṭiau-a ei lovin Thlana te ina ei turah kan inngai. Amaherawhchu Thlana hian kan ei man hi a la duh tlat lo a, an in leh lo thlirin chhungkaw hausa ni lo mah se hmanlai pi leh pute angin mikhual chungah ṭhatchhuah kha a takin an chhawm nung thung.
Buannel thlen hma hauhin Burma-a Mizoten Mizo nun ze mawi a takin an la nunpui tih ka han hmu a, min tih lawm rualin ka thik rilru hle. Republic Veng hian Mizo nun ze mawi ral chho mek chhawm nung turin hma kan la thei, tiin duhthu kan sam a, 'suangtuahna' chauh a nih theih zia lah ka hrechiang si.
(Republican Branch YMA chanchinbu Republican Branch YMA chanchinbu puala ziah a ni a, 19th January 2020 khan tihchhuah a ni)
